همسة

صرخِة خِبِز… بقلم الشاعرة رندة رفعت شرارة

صرخِة خِبِزْ

~

رُصٌّوا الصِّف منيح

أوْعا تْخَطّْوا* الزّْيحْ

صار الأكِلْ تقْنين

الرَّبطَة ما عاد تْزِيْن

ما رَح تشّبِّعْ عيلتَكْ

ولا رَح بتشفي غَلّتَكْ

هودي لْ خبّازينْ

سَكَّرو لْ دكاكينْ

وقالوا ما في داعي

يِشبَعوا لِ مساكينْ

حُطّو لْ خبِز

عَ الصَّاج

وَينو لْ حَطَبْ

لِزّوا * لْ حَطَبْ

والنّار قَبلْ لْ فَجرْ

عَمْ تِلْهَبْ لَهَبْ

قوموا حْمِلوا الكارةْ *

ورِقّوا العجين منيحْ

حاربوا التّشبيحْ

شَبّعوا لْ ولاد

عَدِّة * عنفوانْ

هيدا لَ هَوانْ

بدّوا دَوا

قوموا خْبِزوا خِبزاتكُنْ

كونوا لَ جرح ولادكُن

إنتو الدَّوا

رندة رفعت شرارة


  • تَخَطّوا الزِّيح: تتخطون الصَّف أو الدور أثناء الإنتظار
  • لِزّوا الحطب: إضيفوا الحطب اليابس إلى النار لزيادة اشتعالها
  • الكَارة: أداة من القماش بشكل دائري تستخدم لتنسيق ومد العجينة ولصقها على الصاج لحماية اليدين من الحروق
  • عَدِّة: عدد ١٢ رغيف أو دزينة

مقالات ذات صلة

زر الذهاب إلى الأعلى