عَارِضْ قَلْبِ وْمَرَقْ ،،،
شِبَّاكِ مِنْ كِتْرِ لْ حَكِي تِقْلَانْ ،،،
بْلَاطَه عَ صِدرُو قْزَازِ مِتْلِ عيُونْ ،،،
بَيْنِ لْ غَفَا وْرِمْشِ لْ صَحُو عِلْقَانْ ،،،
وْعَ سَكْتِتُو مْصَفْرَنْ ألِفْ مَلْعُونْ ،،،
وْنِتْفِةْ حَدَا ..كَوْمِةْ حَدَا .. مَلْقُوحْ ،،،
بِي رُوحِ مَا بِي رُوح ،،،؟
بِي رُوحِ مَا بِي رُوح ،،،
وْتَارِكْ جِرِح مَفْتُوح ،،،
وْبَرَّا لْ سَجَر ،
عَمْ يِقْهَرُ بْ رَسْمِ لْ صُوَر ،
وِيْنَشِّرِ تْيَابُو ،،،
عَ حبَالِ صَوْتِ لْ رِيحِ ،
جَنِّ لْ رِيحِ ،
وِعيَاطِ سْكِتِي ،
تِخْطِيطِ وِمْلَاقِط شِتِي ،
تْ دَقْدَقْ سَمَا بْوَابُو ،،،
وْفِي زِيحِ عَ آخِر رَمَقْ ،
شَايِفْ دِنِي إبْرِةْ وَرَقْ ،
وِحرُوفِ بِلْ مَصلِ وْحِبِر ،
شِبْرِ وْشِبِر ،
عَمْ تِدفُشِ لْ مَوْتِ بْ صَبِر ،
وِتْبَرغِي دُولَابُو ،،،
وْعَلْ تَخْتِ قَلْبِ مَوْتَّبِ وْمَوْتُور ،،،
مَوصُولِ بِ سْلَاسِلْ وَقِتْ مَجْبُور ،،،
بِي دِقِّ .. بِي قَطِّشْ .. مَنُو سِئْلَانْ ،،،
فَاتِح مِتِلْ دِكَّانِ ،
عَ حسَابُو ،،،
عَمْ يِلْعَبِ بْ رِزْنَامِةِ غْيَابُو ،،،،!!
قْطُوعِ وْمَرَقْ ،،،،!!!!
(سلامة كل قلب تعبان وسلامة قلب ل وطن )
