من غير ما تحكي

من غير ما تحكي
بسْمع نبض قلبك
وهمسَك
من غير ما تحْكي.

لأنّك بتحبّ الموسيقى
عيوني إلك نغمه
وسكوتي أنا وعم فكّر فيك
غنّيّه…
وكلّ سيمفونيّه لها نهايه
إلّا معزوفة حنين…
إلك وحدك…

يا حارس هالليل
يا أمير الحلوين.
وهيك أنا بحبّك.

نبض الورد أنت…
خلف كل نظره شارده
سحر عيونك إنت…
حكايات وحكايات…
وبأيّا لغه بترجم
كلمة “وهيك بحبّك”؟
يخلّيلي حبّك…

النبض والروح…
لولا قلبَك شو الحياة؟
محتاره شو بختار حرير الخيّاطين
أو حرير الأسرار؟…

شو بدّي بالقصر العالي؟…
أنا وإنت يا غالي
وضحكة عيون كبار.

ما شفت متل هالورده…
كيف الله خلقها هيك
بالصيف وبالشتي
لا بتدبل ولا بتتغيّر

وكلّ ما تشتاق لعيونك
بتلبس لونها الأحمر.

---

• شي يطلع الصبح

إنت حقيقه مش كذبه
ولا حكايه من خَيال

بشوفك بعيوني وقلبي
لأنّك عندي الدني
وكلّ الجمال.

شي يطلع الصبح
بلمحَك عم تبتسم عا بابي
وتقلّي شو حلوين تيابي…
حرير شغل الزوق
ما في متلو بالسوق…

ونشرب قهوتنا
أنا وإنت وأسرارنا
وما حدا بعرف خبارنا
غير عصفور زغير
بيغنّيلنا وبيطير…
وما بيترك جنينتنا…
وهيك بحبّك.

---

بقدر إسمع همساتك
وصدى روحك…
وقلبك بيحكي وبيقول:
أنا وإنت عا طول…

أوّل مرّه بشوف
صوره بتحكي…
حنين العيون موسيقى…
وإنتَ لحن الخلود.

---

إبتسامه حبيبي والأحلام

قلّي حبيبي:
كحلِك زيح
بيزيح الليل…
وحرير صابيعك الغالي
جرح ببالي…
وهيك اشتقتلِّك
يا قمر الليالي.

وقلّي كمان:
ما شفت النور
إلا بعيونِك…
ومخدّة الوحي
كحلِك وجنونِك.
وإبتسامة حبيبي
قدّ الأحلام…
وعيوني ما بتنام
إلاّ ما يكون هوّي
بقلبي وعيوني…
وهيك بحبّو.

ما حبّيت افتح عيوني بكّير
تا ما يهرب حبيبي
من عيوني.
وقلت لحبيبي:
عيونك الفرح والأحزان…
وكلّ حكاية الزمان…
وكلما قلت: بحبّك…
بتلبس الكلمه حرير
وأرجوان…
وهيك بحبَّك…

---

بخاف شي مرّه

قلّي حبيبي:
إذا بتضحكي
بيضوي الحي…

ومن وقتها عم إضحك
تا يشوف طريقو بالليل
وكلّ طريق بتخلص عندي.

تعبانه أيّامي بدونك…
ووجع الغياب
يا عطر الياسمين
خبّر حبيبي
قدّيش نحنا مشتاقين!

قلّي حارس الليالي:
يا هالبنت الزغيره
اللي لقيتِك صدفه…
قولِك الصدفة كانت موعد
أو الموعد كان صدفه؟

وقلّي:
لا تخافي من حدا…
كلّ حدا غيرك صَدى.

بخاف شي مرّه
تطلع من أحلامي…
خلّيك جوّا الأحلام.

---

حنيني الموج والبحر

حبّيت ضحكه من زمان…
من قبل ما يخلقو السنين
كانت الأرض مش موجوده…
وكنت أنا واقفه
بين العتم والنور…

هالضحكه شمس
أو مرفأ حنين؟

أخدني حبيبي من إيدي
عا مدينه جديده…
فيها غناني وبيّاعين…

وبعدني أنا وهوّي
عالطرقات البعيده…
هوّي فرحي الوحيد
وأنا حبيبتو الوحيده…
وهيك بحبّو.

أحلامَك بألوان…
وأنا معك أميرة الزمان.
يسلم لي الحلو
عا دربي وبقلبي
وبكلّ لحظة عمر…

وحنيني إلو الموج والبحر…
وهيك بحبّو.

باللون الأزرق مكتوب حنين…
والنهر غنّيّه…
ورسالة حبّ ..
ولا تغرقو يا
حروفنا الحلوين.

كلود ناصيف حرب
٢١ ك٢ ٢٠٢١
سيدني أستراليا

ملاحظة
جميع أعمال كلود صدرت برعاية مشروع الأديب د .جميل الدويهي أفكار اغترابية، ومنشورة على موقع أفكار أغترابية للأدب المهجري الراقي.

الإِعلامِيَّة وَالأَدِيبَة المَهجَريَّةَ

كلُودنَاصِيفحَرب

مُؤَسِّسَة “بُستَان الإِبدَاع* مساهمة في مشروع الأديب د. جميل ميلاد الدويهي مشروع أفكار إغترابيّة للأدب المهجري الراقي أستراليا
_عضو شرف في نقابة ممثلي المسرح والسينما والإذاعة والتلفزيون في لبنان.