هَالجَمر في عِندوْ عُيونْ وْساع !
وَعَّى بِعَتمْ المَوقَديْ ناروْ ..
طافْ اللَّهَبْ يِشرَبْ مِن سْرارو
لَون العَقيقْ يْحومْ كِيفْ الجَمْر
مَعبَد صَلى تَ الآهْ تِعرَقْ حِبْر ..
كايِنْ هَوااا بالمَدخَني يُوقاع !
وِالسَطر يِنحَتْ بَحِّةْ وْتارُووو ! ..
مْنِ القَبِة طارو سْطور عَ القِبِة
وْفِسْتانْ حاليْ مْزَيَّنْ خْياليْ !
نْ غِبْتي ياشَمسْ وْخَدتي لِ مْحَبِة !
وِنْ غَيَمِت عَ سْطوح مُوّالي
بْجَمِّع صِدِي وِرماد مِن بالي
وِبْضَوّي عَتْماتْ المَدَى بْقَلْبيْ !
ياوْلاد حِرِّيْتي : ارجَعوا !
مْعَلَّق بِ قَلبي قُونِة النِفنافْ
فِستانْ وَحيِي بِقْشَعُو
بِالعَين مَرَّة وْبِالخَيالْ كْتافْ ..
تْجَبَّر عَ إيدِي السَهل وِالغابِة
فَلشُوا الهَوا بِ صِرِّة تْرابي ..
ياوْلاد حِرِّيْتي : اقْشَعوا
بابي عَ كَفّو مَزهَرِيِّة نور
لا العَتم هَد السُور
وْلانْسور اللِّي كانوا دهور
بِ كتابي ..
حَرفْ مَكْسور ! ..
وْمابْخاف ..
ياوْلاد حِرِّيْتي : اسْمَعوا
لِ طيُور بِ تْيابي ..
جْوانِحا بْ تِنْشاف ! ..
عَ الحَبلِ لَمّا بْيِشْرُد خْيالِكْ
وْيْحِفْ بالِكْ عَ نَهيد الروح
وْشيْ يْكون بَعدُو الصَوْتْ
عَم بِيفُوح ..
وْجَوْقِةْ مُوسيقَى عيونْ كِرمالِك !
بِيصيْر حالِك طَيْرِكْ المَدبوح
يِرقُص طَرَب وِاللَّحنِ خِلخالِك ! ..
