القصيده… “إن حَكَت“
إنتَ وأنا، ورقه وحبر وشفاف
لا تخاف، لولا بعيد… ما بخونَك
من دعسة الدّمعه اللي ما بتنشاف
بعرِف ع سطري مرقت عيونَك
وينَك تَعا… تِمّي ما عاد يخاف
وفستان روحي مبكَّل وشفّاف
ع جفون “صبحو” متقَّل الكحله
من لوز جسمي حوِّش النفناف
وفَكفِك بعروة زهرتي النّحله
اقطفني متل شي سنبله بإيدَيك
فْرِكني ع كفّ الشّعر… قَمِّحني
وتا يصير لوني رغيف… مَلِّحني
صمِّد دَهَب وجّي بقلب عينيك
بركي اشتقت شي يوم تلمحني
وما تخاف لمّا تفلّ تجرحني
بتقمَّصك … حتّا بعد ما تموت
رح إلبسَك ما فيك تشلحني
الشاعر المحامي مارون الماحولي
