قصيدة رثاء بقلم الشاعر حبيب يونس لروح صديقه مسعود الأشقر

بَكّير يا مَسْعودْ

بَكّير يا رْفيق الْخَطَرْ
وِالدَّرْب بَعْدو بْأَوَّلو
وْبَكّير يِتْرَجَّلْ قَمَرْ
وِاللَّيْل بَعْدو بْأَوَّلو.
وْبَكّير تَ تْغَمِّضْ عينَيْكْ
وِالْعِمْر بَعْدو بْأَوَّلو
وْبَكّير تَ تْجَمِّعْ إيدَيْكْ
وْبَعْدو السَّلام بْأَوَّلو.
وْبَكّير تِغْرُبْ بَسْمتَكْ
وِالصِّبْح بَعْدو بْأَوَّلو
وْبَكّير تِشْرُدْ نَسْمتَكْ
وِالْعِطْر بَعْدو بْأَوَّلو.
وْبَكّير يوقَعْ مَنْبَرَكْ
وِالْأَرْز بَعْدو بْأَوَّلو
وْبَكّير يِبْقى عَسْكَرَكْ
وَحْدو… ووَحْدَكْ أَوَّلو.
وْبَكّير يا دَمْع نْجَرَحْ
وِالسَّيْف بَعْدو بْأَوَّلو
بَكّير عَ كْتاب الْفَرَحْ
يِخْلَصْ وبَعْدو بْأَوَّلو.

حبيب يونس
11 – 1 – 2021

(الصّورا بعدسة ناجي مسعود)