كان الزمن فلتان
ما في حدا عميسبقو
وْلا في حدا عميلحقو
حتى التقى فيكي عِرِف
إنُّو حلاكي ما انوصَف
قبل الدني خلقان…
كان الوقت ما بينقشَع
متل السكت ما بينسمَع
شافِك متل شمس العرب
سِمعِك نَدَهْ: شو هالطرب
صوتك وتر فنان…
كان العمر ما بينضبط
داق الغلط
شرشر من عيونو نُقط
داخ وبِقي سهران
متل المِن جنونو شرب
راسو انقلب
قام الصبح سكران!
هيدا الزمن والوقت والعمر البقي
وقفو سوا حرَّاس حتى نلتقي
وبتسأليني مين
وليش ناطرين؟
عمينطرو النسيان
يغفى بـ”خبر كان”!
“خبر كان”
