5- بريد الغيب
وتفتفت ترابي !!
وتجمَّعِت ذرات عَ شطوط ل غيوم، ومن كل ذرّه يفوح عُطر ولون !
وعلقان جوّاتُن متل طير بقفص !!
قفص من عتمِه بلا قضبان !!!
لا أرض تحتي ولا سقف فوقي،
ومتل حرف النّون حسّيت المكان ! وتتدور فيّي ريح دولاب الزّمان !!!
وقبال عيني شوف نهر بضفتين، ومتل مسلوب الإرادِه نزلت،
بالمَي
مش بدّي غصب عَنّي !
وبالمَيّ إمشي
إختنق،
هيك مدري كمّ سنِه ضلّيت،
وإسمع حواليّي حكي وأصوات، وعرّب وإسمع كل صوت بصوت ! حتّى المطارح كانت بتحكي ! وسمعِت كل اللي انحكى عنّي،
من يوم ما فتّحت عيني عَ الحياة !
ومتل شجره بيقلعوها من الشّروش، هيك انسحبت من النّهر بعد العذاب،
عاعالم مغطى تلج كلّو ! وإمشي بدون تياب فوق التّلج، والتّلج متل النّار،
وبلّشت فجأه حسّ حالي كبرِت !! وراسي أنتلى بالشّيب،
متل ال كأنّو بالتّلج ضلّيت،
شي مليون عام، وإتعب مَ فيّي نام !
وحسّ منّي انحذف فعل النوم !! وإسمع عليّي يوم يبكي يوم !
ومن بعد ما قصقص عضامي البرد، سمعِت صوت يقول بيكفّي !
هون احضنت حالي عَ كتر البرد !!!
وبكيت حتّى شبعِت،
وكِتر المواجع نمت،
وشو صار بعدا فهمت،
للآخره
خلقِت الدّنيا سهول، زرع وتعب كل الفصول،
وزرع الدّني بالآخره كِبر ونما،
وبسهولها كل شي انزرع بحساب،
سهل ال زرعتو نسر قطّفتو سما،
وسهل ال زرعتو بوم
قطّفتو خراب.
