Reading spa
مرّه بعمر ال ١٢ ١٣
نزلو عيلة امي من الضيعة
خالاتي وخوالي والاولاد وكلن نامو عنا
وكان أحلى شي عنّا بس تجتمع عيلة إمي كلها مع بعضها
ضحك ومزح وفرح وغناني
وإجا وقت النوم
الارض مدروزة فراش فراش
بالمطبخ …بالكوريدور ..ع البلكون بالصالون
نامو الكل راس وكعب
وضل حضرة جنابي
وين بدي نام يا إمي
صارت إمي تفكّر وين بدا تنيمني
وإذ …
بتلمع براسي فكرة جهنمية
ماما فرشيلي بالبانيو
بالبانيو !!!!!
ايه بالبانيو بس قوليلن ممنوع حدا يستعمل الحمام
وطلّعت وزارة الاشغال قرار
ممنوع استعمال الحمام
من الساعة وحدة بالليل ل السبعة الصبح
انا كيّفت
القصة يلي عم بقراها بعدا بنصّا
فرشتلي إمّي حرام بالبانيو
وأخدت قصتي
حطيت مخدتي ع البانيو من فوق
وقعدت قعدة ملوكية
وبلشت إقرا
لا مين يقلي طفي الضو
ولا مين يقلي شيلي هالكتاب من ايدك بقا ونامي
ولا قراية ع ضو البيل تحت الغطا
وكانت أول سويت حجزتا 🤭🤭
مع spa سبيسيال للقراية
الرجاء لمن يريد تسويق الفكرة الانتباه
فإن الحقوق الفكرية مسجلة 🤣🤣🤣
