يَ بْلَا حَيَا ،،،

لِ عيَادِ مَنَّا عيَاد ،،،
وْفِي ديَابِ عَمْ تِنْهَشْ مِنِ عضامِ لْ فَقِير ،،
وِلْ شَلَّعُو لِ بْلَاد ،،،
عِنْدُنْ عَزَا بْ بَيْتِ لْ ضَمِير ،،!!

لِ عيَادِ مَنَّا عيَاد ،،،
وْفِي نَاسِ بِ ديُورِةْ صَلَا نْعَجْنِتْ صَلِيبْ ،،
وْكِلْ مِينِ عَنْ خَيُّو غَرِيبْ ،،
وْلِ تْرَابِ عَمْ بِي نَجَّدِ فْرَاشِ لْ وُلَاد ،،!!

لِ عيَادِ مَنَّا عيَاد ،،،
وِبْ سَكْرِةِ لْ رِعيَانْ ،،،
فِ عيُونِ بِ عيُونَا وِقِفْ شِرطِي لْ زَمَنْ ،،
عَمْ تِحصُدِ شْوَاكِ لْ وَطَنْ ،،
وَحدَا عَ كِتْفِ لْ زِلِّ عَمْ تِدفَع تَمَنْ ،،
وِلْ قَمْحِ بَطَّلْ قَمْحِ صَر زِيوَانْ ،،،!!

وِمْنِسْألُو لَلْ عِيد ،،،
نْ حَامِلْ مَعُو شِ رشُوشِ لَلْ جِرحِ لْ عَتِيقْ ،،
لْ صَرلُو عِمِر تَحتِ لْ عِمِر مِتْلِ لْ غَرِيقْ ،،!!

وِمْنِسْألُو لَلْ عِيد ،،،
لَيْشِ لْ بَشَر مَنُّنْ بَشَر ،،
لَيْشِ نْكَسَر قَلْبِ لْ دِنِي ،،
بْ ضَربِةْ حَجَر ،،
لَيْشِ لْ فِقِر وِجُّو غَنِي ،،
وْلَيْشِ لْ كِفِر لُو نْيَابْ ،،،
مَنَّا غَنَمْ .. نِحنَا بَشَر يَ ديَابْ ،،،
نِحنَا بَشَر مَ مْنِنْحِنِي ،،
لَوْ مَلَّحُو طِينِ لْ دِنِي بِ رغِيفِنَا .. وْلَوْ غَابْ ،،،!!

لِ عيَادِ مَنَّا عيَاد ،،
لْ إنْسَانِ عِنْدُنْ مَمْسَحَا ،،
كِفْ شِكْلِ كِلْ هَلْ ظِلْمِ بَعدُو مَ سْتَحَا ،،
وْفِي طِفْلِ عَمْ يِتْمَرجَحِ بْ حِضْنِ لْ فَزَع ،،
إمُّو لْ بَرُودِي وْفَرشِتُو خَنْدَقْ وَجَع ،،
وِعنَادِ قِدِّيسِينْ ،،،!!

يَا عِيدِ بِي كَفِّي عَمَا ،،
طَقِّ لْ حَيَا ،
شَتِّي جِنُودِكْ يَا سَمَا ،،
تَ تْحَرِّرِي لِ بْلَاد ،،،!!
وِتْحَروِقِي شْيَاطِينْ ،،،!!!

لِ عيَادِ مَنَّا عيَاد ،،،!!!

© written by : V. Rebelde ★

إم ب غزة نشرت هالصورة وكتبت : “ولادي نايمين هيك…”

يا رب ريّح وخلّص أوطاننا من هل شر..