إياك تِكْتُب شعر لَناس ما بتقْرا
متل لعن تراب الوجع لحروف عم بِلم
وحامل بإيدو قلم تَيقشّر الفكرا
يعبّي بكاسو حِبر ويكْمّل السكرا
إياك تزرع حَبَق لَناس ما بِتْشِمْ
وإياك تِكْتُب شعر لَناس ما بتقْرا
🎼🎼🎼🎼
كنّا ولاد زغار تَا نلعب
نوقَع ل حتَّى يفكرونا ميتين
واليوم صرنا كبار والأصعب
منوقف ل حتَّى يفكرونا طيبين
🎼🎼🎼🎼
فجر تاني يوم
نجمة فَجر عا سطح بيتي لافية
والضّوْ عربش عا برادي النوم
وتعبِتْ فراشة غرفتي من الحَومْ
ومن كتر ما صفحة سمانا صافية
بتقشَعْ بعينك فجر تاني يوم
🎼🎼🎼🎼
قديش قالو شِعر عن بيروت
وقالوا كأنَّا تدمّرت كِلاَّ
وشي قَالْ طلع البحر يحتلاَّ
بيروت دَقّتْ عَ السّما تتفوت
وتَ ما تموت .. تهدّت بألله
🎼🎼🎼🎼
بِشْلَحْ عا بَابِك نظرة غروري
بحوّشلِك النجمات لو بدِّك
وتوب القوافي مفصلو قدِّك
صَرلي عُمُرْ عم بقنع الجوري
وبعدو ما صدَّق مش إبن خدِّك
