بإيدي صار و قاعد معي
ضحكو عصافير عينيي
قديش فيقتو حتى وعي
بعيد عني و موجود فيي
هيدا العمر ما قلي تعي
هيدا العمر شغل إيديي
🌾🌾🌾
خلص صرنا بعاد
و العقد انفرط
و بيناتنا صار
جبال فوق جبال
ليش تا بسرعة
قلنا ما زبط
و صار الوهم مارد
و انخدع الخيال
لو تعاتبنا لنو شوي
لو سألنا لنو سؤال
تاري ابعد مسافي
هيي البال
ابعد مسافي
انك تفهمني غلط
🌾🌾🌾
الصبح جايي غصب عنو
فايق عم بفرفك جفونو
مع الليل مشكلا و جنو
ضل و فل الليل و جنونو
بمرايتي ضويت مش منو
تنينا غمرنا غيابو كأنو
صرنا ايد الصبح و عيونو
🌾🌾🌾
بصابيعي جرحت الحبر
خجل و عض عاجرحو
وعزمت الورق عالسفر
فل و ما ترك ملحو
عا قد ما كتير القهر
وقفو تنينن عالسطر
ما عرفو يكتبو و لا يمحو
🌾🌾🌾
حبة رمل
جرحت الصَدْفي
عضِت عا جِرحَا
الليل بِطولو
ضوَّا القمَر
عيون الصبر نتفي
نَقَط دمع
حتى الجِرح يشفي
تنهدت من قلبها
و بيَّن اللولو
