كتاباتي مراية قلبي

قولك ليه هيك
تغير لون الفرح
شو صار ت ما عاد
يزهر في موسم الربيع ..
يمكن من شتي الايام
والبرد القارس
وضجر الأحلام
ووجع الغياب

يمكن من قوة الشمس وحرارة الصيف ..
يمكن قد ما غرد
عصفور الصباح انبح صوتو
وما سمعو إلا صدى .

رح جرب من جديد
اقطف حروف من ذهب مطرح ما شلحت عطرك
يا حب ع شالي الأخضر ولونت شجر الخريف
بعطر الورد.

يمكن بالموسم اللي جايي يرجع معي كل اللي غاب وارجع قلك يا قمر المواعيد وقلك انت انت انت
وحدك … كل العيد.

هالسنه ناقصه كلمه.
لا إنت بتقولها لا أنا .
لانو اللي بيني وبينك
أكبر من كل المشاعر.
أغمق من التفكير .
بيني وبينك كتاب صلا.
ايه كتاب صلا وعبادة..
وروح بتسافر.

بقطف الزهره الحمرا وبسأل:
بحبك؟ ما بحبك؟
أكيد بحبك
واكتر من بحبك بكتير.
يا حبيبي الأمير.
يا فرحي الكبير.
وهيك #بحبك.

هملني حبيبي
أنا الوردة البريه.
أخذتَني الريح الجبليه.
حاكاني حبيبي
وضحكلي من بعيد.
خلقت من جديد.
يا هالسنه اللي راحت
خدي الأحزان.
ويا هالسنه اللي جايي
خلينا نلتقي
وافرح بعيونو الحلوين .
وبضحكتو الغالية .
ويحلا الزمان.

اشتقتلو كتير هالامير
أنا ومعو بتكبر الفرحة
وأنا بدونو بتكتر الدمعه.
وهيك #بحبو.
*الشاعرة كلود ناصيف حرب