مشوار رحنا سوا بصيفية حزيران
نسجد ع باب الهوى وبسرِّك تبوحي
تحرقص جنون الهوا وصار الورد عطشان
لما غمرتو ارتوى من خمرة جروحي
لما رميت البصر عا خرنة المرجان
حسّيت قلبي انعصر عا مكبس سفوحي
وبُعد المسافة اختصر عا مفرق الأزمان
والعطر فيكي انحصر عالزهر ت تفوحي
وخوفي ت يوعى الضجر وينقّز الغزلان
غفّيت حلم الغجر ع مخدة طموحي
وحتّى م يقسا الحجر عا جسمك الدفيان
كلما يلوح الشجر بيخصرك تلوحي
وضعنا م بين الودا وصفنة صدى هربان
والورد خبّا الندى عا عتبة صروحي
وتاما يشوفك حدا ويخبّر الجيران
صنتك ع طول المدا بعذريّة شلوحي
ولمّا غمرتك غمر وتفرفط الرمّان
حسّيت روحك جمر عم تاكل بروحي
وصفّيت من دون خمر عا بسمتك سكران
وشفاف تأمر أمر وتقول م تروحي
