انا و الليل الطويل

أنا والليل الطويل
سهرانه وحدي ورا الشبّاك
والليل هوي ليل السهرانين…
وفي ناس ناموا
لأنو الحبّ ما مرق بالبال متل خيّال..
وبعرف إنو حبيبي سهران متلي والقنديل ما بينطفي بالليل الطويل.
وشو عم يحكي عن عيوني؟
وشو عم يهمس للنجمه البعيده؟ عم بيقول:
بحبّك وأنا عم قول بحبّو
قولكن حدا بيسمع وبيخبّر إمّي؟ وهيّي قالتلي:
مش لازم إحكي معو..
ولا رافقو عالغابه الوحيده
اللي خلف العتم والريح…
والحبّ مش إسوارة بالإيد
تا ننسى المواعيد…
الحبّ قدر…
وحبيبي كان قبل الزمان
ورح يكون بعد الزمان…
يا ليل سهّرني بعد
واحملني عا جناح الوعد…
ويا عطر وردتين
شو خصّني بالناس؟…
والناس هنّي بس تنين…
أنا وهوّي وما بيعرفنا حدا إلا سهر العينين.‎

اذا سالوني عن الحلو بقول مرسوم بعيوني.. بكلامي..
وبيمشي قدامي…
قديش بحبو انا؟
قد السما والشمس والافكار ..
ولو غاب عني
بيغيب قمر الدار.
وهيك #بحبو.

كيفك يا حلو …
كيف صوتك والوتر
انبح من كتر ما خبرني عنك
الصيف والقمر ..
لا الشتي ولا الغياب بيمحو لون عيونك ..
غرد طير الحب بالعالي
وأخذ معو فرح قلبي للغالي ..
شو بتكتب ت قلك وشو بقلك قللي
لا بتغيب الشمس عنك يا سفر
ولا رح اتأخر عنك يا عمر .
مع كل بحة صوت
رح اسمع كم مرة دق قلبك لم ندهلي
بعد ما سافر ربيع ورجع قريب
حامل معو كل سحر الكون بسلة
وصوتك اللي بحب اسمعو كل يوم بقلبي.

مشتاقين يا قمر تشرين.
يا عطر الياسمين .
يا رفيق السهرانين .

الايام بتتغير.
لون السما بيتغير.
حتى الوردة بتقلع تيابا وبتلبس البكي. والشجر الأخضر بالريح بيتكسر..
انت وانا يا حبيبي وحدنا اللي ما بتغلبنا الايام الصعبة.
ولا بيسرقنا عتم الغربه.
والحب اللي انكتب بحبر الخلود.
نحنا منكبر يا حبيبي وهوي معنا بيكبر. والحنين بيكبر.
وهيك انا #بحبك.

تسلم هالضحكه والعيون اللي بتحكي. وشو بتحكي.
بركي بشوف ضحكتك …
ورا البردايه .

الشاعرة كلودناصيفحرب