رح إنطرك
رح انطرك كل العمر
ولو تأخر الوقت
بعرف انك جايي
تقطف معي سنابل القمح
وزهر الياسمين
مع غنية عصافير مشتاقين
رح انطرك بغابة الحور والشربين
مطرح ما كنا نركض
مع الفراشات
ونلون بالشمس وجه الارض
والسما بنغمات حنين…
رح انطرك
مطرح ما كحلت عيوني
بضحكة الفرحانين…
بس لا تتاخر
حتى ما ينطفي قنديل الليل
وتسرقني العتمة
ويحتار القمر
ويخبر الجيران….
ويسأل: وينن؟
وين راحو هالحلوين؟
وساعتها شو رح بيصير؟
بتسرقك مني
حكايات الناس
وبصير اركض مع الايام
تا لملم دقات قلبي
واربطها بشال الحرير…
وقلك: كل دقة قلب الك
يا برج المواعيد.
خليهن عندك وخبيهن
تا ارجع شوفك بالعيد
لا تتاخر حبيبي.
رح تنطرك كل العمر
سيدة الحنين
وكرمالك عمري نطرة السهرانين…
وهيك بحبك.
غنّيت لعيونك
وحياة هالورده المخمليه
وهالنجمه الصبيه…
انا اللي خبيتك بكتابي…
وغنيت لعيونك
وبتسالني كيف بحبك؟
متل السحر…
متل شي رحله
عا أرض مجهوله…
متل العوده للطفوله
والحب مش نظره
ولا كلمه بيمحيها الزمان…
الحب مكتوب بحبر النطرة
ومتل الشجره
اللي واقفه بالريح
ما بتزيح
ولا بتغلبها الأحزان…
هيك بحبّك.
صباح الورد الازرق
بلون الحبر.
والنور اللي طالع من الليل
تا يمحي العتمة.
صباح الفرح بعد الحزن. ورجعة حبيبي من غياب. قمري وعمري،
وقصيدة بكتاب.
وهيك انا بحبو.
