الشاعر قزحيا ساسين
شمس… عا دِبق الصُّبِح
بتَعرف عصام… الشِّعر مش بَكّير
عالحَرب رُحنا… النَّصر بِيراس الرُّمِح
وْلا الشّمس لِ بْتِنحت خْيال كبير
بتِعلَق مِتل عصفور عا دِبق الصُّبِح
صعبِه القَوافي… قلال عم بِيصِير
لْ بَيناتُن وبَين الحَلا خُبز ومِلِح
مش هَيّنِه عصفور حِبر زغِير
تا يرَيّش… يغَنّج المِلح لْ بالجُرِح
ولا هيّنه لْ صَرلو عُمِر بِيطِير
وحَقل الحَكي مغَيَّب جناحو كتير
يفرُك تراب الحقل تا يصفّي قَمِح
- مهداة من الشاعر قزحيا ساسين بمناسبة ذكرى السنة الثانية لجائزة عصام العبدلله
