بالبال…
بالبال
حَدّْ لْ بَحر في قهوة
بيلتِقوا فيها
جناني الشِّعر
وبيسرحوا لْ كِلماتْ
شي دَمع، شي بَسماتْ
وفَوق لْ بَحِر… بَيروتْ
بتدِير ذَيْنِتها
لَ تسمَع.. شِعرْ
تسمَع حَكي
تسمَع صوات السَّكتْ
وتِقعُد إنِتْ
وحَدَّك أنا شوف الدِّني
مَوج وسما وضِحكاتْ
شوفَك وطَنْ
جامِع بحضنو كتارْ
شي شِعر، شي حامِل ..
خبارْ خبارْ
وينَك تَعا.. صار الأحَدْ
خِذني بإيدي عَ لْ بلَدْ
ارسمني سَطر فوقو وَلَدْ
غافي تحت فيِّة التين
فايِق على وَعد انوَعَدْ
إنّو عَ بُكرا راجِع يلاقيكْ
تِمسَح بإيدَك غَبرِة الإيِّامْ
نسهَر سوا لا نتعَبْ ولا ننامْ
ويشرُق عَلينا فَجِر صبح جديدْ
وتبقى لَ قلبي فَرحتو ولْ عيدْ
** أخي الحبيب بلال شرارة، كل عام وإنت بخير
رندة رفعت شرارة
