بيروت…
كانت عم تضبضب نهار الشوب…
وتبدا تفلفش ليل بتحبّو…
وما ضل عَ حبل الشمس غير توب…
قلاّ البحر.. عنّك أنا بضبّو…
وكانت متل كل يوم حلوي كتير…
عالشط عم تضحك مثل زهرة…
وعين المريسة مبلشي بكير…
تخبز على كورنيشها سهرة…
وفجأة الدني بترجف تحت لبيوت…
وبتصير ريح الموت مرجوحة…
تكسّر بمطرقة الصدى لِ سكوت…
يفرفط قزاز ويكتب جروحة…
ومن بين دخّان العصف بتفوت…
إيد السما من شقوق مفتوحة…
بتطّل بتلاقي السما بيروت…
فوق الجمر والنار مشلوحة…
عم تحترق بيروت ضجّ الصوت…
وكيف رح من صدّقو هيكي…
ما الدهر علّمنا قميص الموت…
مش بالسهل بيبكّل عليكي…
بيروت قومي يا عروس الشرق…
شتّى بِ آب الغيم يبكيكي…
بين البقي وال مات مافي فرق…
بحالي أنا المفروض عزّيكي…
عليكي حترق لبنان كلّو حرق…
وبيروت فيي يقول خليكي…
ومش بس موتِك كان متل البرق…
منموت فيكي كتير كنّا نقول…
وعنجد مِتْنا كِلنا فيكي…
