واصل …مْأخَّر
“”””””””””””
اعْزمني عا حزنَك … رح قول :
” وقت اللي بدَّك جايي “
اعْزمني عالفرحه … رح قول :
” بدَّك تنطرني كْفايِه “
الدمعه بالجيبِه عا طول
بسّ الضحكِه … توصايِه
إفتَح الباب
“””””””””
إفتَح الباب مْليحْ
تَ يْفوت من بابَك صبح أشقَر
والليل يتأخّر
وافْتاح بابَك للهوا والريح
وْلا تْصدّق اللي قال : سدّو واستريح …
اللي قالها … مْعتّر …
إفتَح الباب … وْشرّعو أكتَر
وْمش همّ لو كانو العواصف خُوت
ولون السما أحمَر …
وْلا تخاف إنّو تْموت
ما الموت ما بيفوت
إلّا إذا بابَك بقي … مْسكَّر …
واحد إسمو ” عا طول “
تزوّج وحده إسما ” وَلا مرّه ” …
وَلا مرّه
“”””””
” عاطول ” متْزوّج ” وَلا مرّه “
بيقلّها مرّه :
لش تا أنا لِ بْصالحِك عا طول
وْإنتي … وَلا مرّه ؟
احْتارت ” وَلا مرّه ” شو بدّا تْقول
وْتا تكسر الجرّه … فرد مرّه
قالت : اسْمعني يا ظريف الطول
بالبيت تاركني أنا … عا طول
إشرب لَ وحدي عيشتي المُرّه
وْعا طول … بتْقلّي أنا مشغول
وْبنطر تجي من سهرتَك برّا …
مش قلت رح بتْحبّني … عا طول ؟
يا حِبّني عا طول … يا ” عا طول “
يمّا بَلا ما تْحِبّ … بالمرّه …
.
الطُعم … مش بالإيد
“””””””””””””””””
جابو الطُعم … قالو إذا بتْريد
حتّى يجيك الدور … بالبيت انْحِجِر
بْكلّ الدني بيْطعّمو بالإيد
بْلبنان وحدو بَسّ في إيد … وإجِر !
.
.
.
